গীতাঞ্জলি দেৱী
ঘিটমিটীয়া আন্ধাৰৰ মাজত মই অকলে ৰৈ আছোঁ । মোৰ উশাহ-নিশাহ বন্ধ হোৱা যেন লাগিল । এনেদৰে কাৰেণ্ট গ'লে মুহুৰ্ততে জেনেৰেটৰ চলাই দিয়া হয় । খুউব বেছি এক-দুই মিনিটৰ ভিতৰতে ধপ্-ধপ্ কৈ জেনেৰেটৰ চলে আৰু লগে-লগে চাৰিওফালৰ পৰিৱেশ আকৌ দিন যেন পোহৰ হৈ পৰে । আজি দেখুন জেনেৰেটৰ চলাৰ শব্দই শুনা নাই । কি হ'ল আকৌ ! আন্ধাৰৰ মাজত এনেদৰে ৰৈ থকা প্ৰতিটো পল মোৰ বাবে এযুগ যেন লাগিল । ক্ষন্তেক আগতে মই দেখা অদ্ভূত দৃশ্যটোৱে মোক হতবাক কৰাৰ লগতে অস্থিৰ কৰি ৰাখিছেই তাতে আকৌ এতিয়া চোৰে চৰ মাৰিলেও নেদেখা আন্ধাৰ । মোৰ চুলিৰ আগে জিউ যোৱা উৰি যোৱা উপক্ৰম হ'ল । মই বিক্ৰমক মাতিছিলোঁ । কিন্তু ইমান সময়ে সিও আহি নাপালেহি । মোৰ লগত এয়া কি হৈ আছে বাৰু ?
হে ভগৱান ! হয় জেনেৰেটৰ চলক , নহয় বিক্ৰম আহক । কিন্তু কোনো এটাৰো দেখা-দেখি নাই । ভয়ত মোৰ চিন্তা শক্তি লোপ পোৱা যেন লাগিল । ঠিক সেই সময়তে মই অনুভৱ কৰিলোঁ মোৰ সোঁকাষে যেন কোনোবা থিয় হৈ আছে আৰু কাণৰ কাষত কাৰোবাৰ উশাহ-নিশাহ লোৱা শব্দ শুনিবলৈ পালোঁ । এনেকুৱা লাগিল যেন মোৰ সোঁ গালখনৰ পৰা ডিঙিলৈকে খুউব চেঁচা , হীম শীতল এছাটি বতাহ বৈ পৰিছে । অতি পাত ঠাণ্ডাৰ দিনত বন্ধ কোঠালিৰ ভিতৰত , এজাপ কাপোৰৰ মাজত সোমাই থকাৰ মাজতো যেতিয়া কোনোবা সুৰুঙাৰে শীতল, চেঁচা বতাহ এছাটি গাত লাগে আৰু তেতিয়া যেনেকৈ গাটো সিৰসিৰাই উঠে , এই মূহুৰ্তত ঠিক তেনেকুৱা অনুভৱ কৰিলোঁ মই । উস্ ! ইমান চেঁচা ! কি হ'ব পাৰে বাৰু ?
এতিয়া নি:শ্চয় এখন হীম শীতল হাত মোলৈ আগবাঢ়ি আহিব আৰু সেই হাতখনৰ প্ৰসাৰিত দীঘল আঙুলিবোৰ মোৰ গললৈ বুলি …… । আৰু মই …। মই
আৰু ভাবিব নোৱাৰিলোঁ ।
মোৰ অণ্ঠ-কণ্ঠ শুকাই গ'ল । মই মৰিলো নে জী আছোঁ বাৰু ? সোঁ হাতখনেৰে লাহে-লাহে নিজৰ সোঁ গালখন চুই চালোঁ । ইমান চেঁচা ! মোৰ হাতখনো চেঁচা পৰি গ'ল । মোৰ উশাহ-নিশাহবোৰ ঘন হ'বলৈ ধৰিলে । কোনোমতে দীঘলকৈ উশাহ এটা টানি লওঁতে ধুনীয়া গোন্ধ এটা নাকত লাগিলহি । বতাহত ভাঁহি আহিছে এক অনন্য সুগন্ধি । মোৰ আন্ধাৰ কোঠাটোত সেই সুগন্ধি বিয়পি পৰিছে। আস্ কি সুগন্ধি ! ইমান ধুনীয়া গোন্ধ । কিবা ফুলৰ গোন্ধ চাগে …… । হঠাৎ মোৰ গোন্ধটো চিনাকি-চিনাকি যেন লাগিল , মই যেন আগতে ক'ৰবাত এই সুগন্ধি পাইছোঁ । কিহৰ গোন্ধ বাৰু ? এইটো … এইটো বিকিয়ে লোৱা পাৰফিউমটোৰ গোন্ধ দেখুন …। হয় , হয় । এই সুগন্ধি মই চিনি নাপামনে ? বিকিৰ গাৰ পৰা ভাঁহি অহা মিঠা সুগন্ধি এতিয়া মই ৰৈ থকা এই আন্ধাৰ কোঠালিত বিয়পি আছে ।
তাৰমানে কোঠাটোৰ ভিতৰত মই অকলে নাই , বিকিও আছে । মানে বিকিৰ অশৰীৰ আত্মা মোৰ নিচেই কাষত থিয় হৈ আছে । যাৰ নাকৰ নিশ্বাসত মোৰ সোঁ গালৰ পৰা ডিঙিলৈকে এটা হীম চেঁচা সোঁত বৈ আহছে ! হে ভগৱান ! মই আৰু ভাৱিব নোৱাৰিলোঁ ।
এনেতে বাৰাণ্ডাইয়েদি এটা পোহৰ মই থকা কোঠাটোৰ দিশে আগবাঢ়ি অহা দেখিলোঁ । খৰ-খোজেৰে কোনোবা আহিছে । নি:শ্চয় বিক্ৰম । খোজৰ গতিৰ লগে-লগে তাৰ হাতৰ টৰ্চ লাইটৰ পোহৰটোও আগবাঢ়ি আহি আছে । পোহৰটো মোৰ কোঠাৰ দুৱাৰমুখ পোৱাৰ সময়তে জেনেৰেটৰটোও ধপ-ধপকৈ শব্দ কৰি উঠিল আৰু চাৰিওফালৰ লাইটবোৰ জ্বলি উঠিল । পোহৰ হৈ পৰা অফিচ-কোঠাটোৰ চাৰিওফালে সভয়ে চকু ফুৰাই চালোঁ । নাই , একো নাই দেখুন । মোৰ কাষত ৰৈ থকা কাৰোবাৰ উপস্থিতিও নাই । মোৰ গাল আৰু ডিঙিত লগা চেঁচা স্পৰ্শ সেইবিলাক এতিয়া নাই । মাত্ৰ দুৱাৰমুখৰ পৰ্দাখন সামান্য লৰি আছে । কিন্তু কোঠাটোৰ ভিতৰত এক মিঠা সুগন্ধি বিয়পি আছে।
:: বাইদেউ , বিক্ৰমে কোঠাটোলৈ সোমাই মোক তেনেকৈ থিয় হৈ থকা দেখি মাত লগালে ।
::অঁ বিক্ৰম । আহিলা ? পিছে , মই যাওঁৱেই নেকি !
তাক দেখিহে মোৰ শুকাই যোৱা কণ্ঠলৈ পানী আহিল ।
::হয় বাইদেউ , কাম হ'ল যদি আপুনি যাওক গৈ আৰু এটা কথা বাইদেউ , আপুনি অকলে দেৰিলৈকে অফিচত নাথাকিব । গধূলি হোৱাৰ লগে-লগে পাৰিলে যাবগৈ ।
" কি কয় বিক্ৰমে ? তাৰমানে বিক্ৰমেও মোৰ দৰে কাৰোৱাৰ উপস্থিতি অনুভৱ কৰিছে নেকি ? বিক্ৰমে এই অফিচটোত কাৰোৱাক দেখিছে নেকি বাৰু ? অশৰীৰি কিবা ? নে আন কিবা কথা ? " সি কিয় তেনেকৈ ক'লে?
::কিয় ? কি হ'ল বি ক্ৰ ম ? মই ভয়ে-ভয়ে তাক সুধিলোঁ ।
:: বিশেষ একো নহয় বাইদেউ । ভয় নাখাব । মই আপোনাক কালিলৈ দিনত ক'ম । এতিয়া আপুনি যাওকগৈ ।
::ঠিক আছে । এটা কথা সুধোছোন বিক্ৰম , তুমি বাৰু খুউব ধুনীয়া গোন্ধ এটা পাইছানে ?
::অঁ পাইছোঁ , মই বাৰাণ্ডাখনেৰে আহি থাকোঁতেও পাইছিলোঁ । এতিয়াও পাই আছোঁ । আপুনি ধুনীয়া গোন্ধৰ পাৰফিউম লৈছে বুলিহে ভাবিছিলোঁ । কি কথা বাইদেউ ? কিয় সুধিলে ?
::নাই , এনেয়ে । এইটো মই লোৱা পাৰফিউমৰ গোন্ধ নহয় । ক'ৰবাত কিবা ফুলিছে চাগে । বাৰু , ই জিতু অহা নাই নেকি ? মই পাৰফিউমৰ গোন্ধৰ কথাটোৰ পৰা আঁতৰিব খুজি কথাটো সলালোঁ আৰু ফাইলবোৰ জাপি যিমান পাৰোঁ সোনকালে কোঠাটোৰ পৰা ওলাই যাবলৈ খৰ-ধৰ কৰিলোঁ ।
::ব'লক বাইদেউ , মই আপোনাক অলপ আগবঢ়াই দিওঁ ।
এইবুলি বিক্ৰমে দুৱাৰৰ তলাটো মাৰি মোৰ লগে-লগে অফিচৰ গেট খনলৈকে আগবাঢ়ি আহিল । মোৰ চিন্তা, ভয়- সংশয়বোৰ বাঢ়ি গ'ল । বিক্ৰমে মোক কি ক'ব খুজিছে বাৰু ? কালিলৈ সি মোক ক'ব লগা কথাটো বিকিৰ স'তে জড়িত নহয়টো ?
আগলৈ…
ReplyForward |
