বিদ্যাজ্যোতি গগৈ
চ'তৰ কিনকিনিয়া বৰষুণত
ফাগুনৰ পছোৱাই লঠঙা কৰা
গছ লতাবোৰ জীপাল হ'ল
আৰু জীপাল হ'ল দুবৰী বন ।
প্ৰকৃতিয়ে সলাব নতুন সাজ
গোলাপ তগৰ গন্ধৰ
মাতাল হব ব'হাগ ।
ডাকোৱাল কুলিয়ে দিব
বহাগৰ বতৰা আৰু
মাজনিশা কেতেকীৰ হিয়া
ভঙা কান্দোনত
সাৰ পাব প্ৰকৃতি ।
আশাৰ বৰষুণজাকে
বহাগক আনিব মাতি
ন-পানীৰে উপচিব পথাৰ
উজনি ভাতনী কৰিব
দলনীৰ মাছ ।
জীপাল হব পানীমেটেকা
পথাৰৰ পচা নৰাৰ গন্ধৰ
কৃষকৰ অনাবিল আনন্দ
কলা মেঘবোৰ আঁতৰি
আকাশ ফৰকাল হব
সময় গতি কৰিব প্ৰকৃতিৰ
বিনন্দীয়া ৰুপত ।
গৰখীয়াৰ পেঁপাৰ সুৰে
কাণে কাণে কৈ যায়
উন্মনা বহাগ আছেহি ৰৈ ৰূপহী আইৰ দুৱাৰ ডলিত ।
