মই শ্মশানৰ পৰা কৈছোঁ

ৰঞ্জিত বৰ্মন  গোৱৰ্দ্ধনা, বৰপেটা

সভ্যতাৰ শিখৰত থকা

হে’ মানৱ সমাজ,

মই শ্মশানৰ পৰা কৈছোঁ !

সমাজৰ দুৱাৰে দুৱাৰে

নিক্ষেপ কৰিছোঁ 

মোৰ শব্দভেদী বান ;

কোনোবাই শুনিছানে ?

মোৰ লগত আছে 

জীৱন যুজৰ বহু ভাগৰুৱা পথিক ৷

পুত্ৰৰ পৰা পিতৃ হৈ 

সভ্য সমাজৰ বৰ্বৰতাত ,

পুত্ৰ বোৱাৰীৰ মৰমৰ অত্যাচাৰত 

বৃদ্ধাশ্ৰমৰ পৰা শ্মশানলৈ ;

যাত্ৰাৰ শেষত 

মোৰ লগতেই আছে 

বহু ভাগৰুৱা পথিক ৷

পদে পদে অৱহেলিত 

তৃতীয় প্ৰজন্মৰ স’তে 

একাত্ম হোৱাৰ পৰা

বহু দুৰৰ বৃদ্ধাশ্ৰম নামৰ

পিঞ্জৰাত আবদ্ধ ;

সিহঁত মোৰ সহযাত্ৰী শ্মশানৰ ৷

সংসাৰৰ মায়া মোহত থাকোতে 

কৰ্মফলৰ কথা শুনিছিলোঁ ;

যি কৰ্ম কৰিবা

তাৰেই ফল পাবা ৷

মই শ্মশানৰ পৰা কৈছোঁ 

কৰ্মফল যদি সঁচা,

বৃদ্ধাশ্ৰম বোৰ চিকুণাই থোৱা ;

সভ্যতাৰ শিখৰত থকা

হে’ মানৱ সমাজ ,

কৰ্মফলে তোমাক ৰিঙিয়াই মাতিব

তোমাৰ গন্তব্যস্থানলৈ;

তুমিও হ’বা এদিন অৱহেলিত ;

পিঞ্জৰাত আবদ্ধ হ’ব কৰ্মফল

বৃদ্ধাশ্ৰমৰ পৰাই হ’ব

তোমাৰো শ্মশানযাত্ৰা ৷