প্ৰগতি গগৈ চাংমাই, নাজিৰা
কুমলীয়া কুঁহিপাতৰ কৰণি
কুলিৰ আকুল বিননি,
বসন্তই কৰিলে প্ৰকৃতি শুৱনি
দেহ-মন উতলা কৰি।
বসন্তৰ বৰষুণে ধোৱাই নিলে প্ৰকৃতি
দিলেহি কৃষিৰ জাননী,
পথাৰ পৰিল পানীৰে উপচি
শস্যৰ বীজ সিঁচিবলৈ এধানি এধানি।
ন বাৰিষাৰ ন পানীত
উৰ্বৰা কৃষিভূমি
শইচ সোণোৱালী
চহকী কৰিব কৃষকৰ ভঁৰালটি।
বহাগ আহে, উছাহ বাঢ়ে
হিয়াৰ বতৰা কঢ়িয়াই আনে,
পাহুৱাল ডেকাটিয়ে হাল যুৰে
মনৰ হেঁপাহত সুহুৰি সৰে।
লেখিকাৰ ঠিকনা-
নাজিৰা
