সঞ্জীৱ বাইলুং
স্বাভিমান
আছে বাবেই
নিজকে অসমীয়া বুলি
চিনাকি দি ভাল পাওঁ
যিদৰে ভাল পাওঁ
মোৰ জন্মদাত্ৰী আৰু
আই অসমীক ।
স্বাভিমান
আছে বাবেই
মোৰ সুৱদি সুৰীয়া
মাতৃ ভাষাক লৈ গৌৰৱ কৰোঁ
য'ত নিহিত আছে
আত্মবিশ্বাস আৰু প্ৰত্যয়েৰে খামোচি থকা
জীয়া জীৱনৰ আশ্বাস ।
স্বাভিমান
আছে বাবেই
মোৰ আইৰ
মুখৰ ভাষাৰে
গীত গাওঁ, কবিতা লিখোঁ
সৃষ্টি কৰোঁ সাহিত্য সম্ভাৰ ।
স্বাভিমান
আছে বাবেই
মই নিজৰ জাতিক ভাল পাওঁ
আৰু ভাল পাওঁ
চিকুণ চেনেহী মুখ
য'ত দেখা পাওঁ
বিশাল ভাতৃত্ববোধ ।
