নাৰীৰ উচুপনি

 প্ৰগতি গগৈ চাংমাই

নাৰীৰ উচুপনি

#প্ৰগতি গগৈ চাংমাই

তেওঁ চকুপানীবোৰ লুকাই,

অভিনয় কৰে;

ত্যাগ কৰে সৰ্বস্ব,

সন্তানটি ভাল হওক!

মমতাৰ নৈ এখনি বৈ ৰয় বুকুৱেদি

অহৰহ৷

যন্ত্ৰণাখিনি লৈ ফুৰে মনত

আইৰ ঘৰ বহুদিন নেদেখাৰ৷

নিজানত দুপৰ ৰাতি কান্দে অকলে

চিঞৰি কান্দিবলৈ ভয়,

মাজনী সাৰ পাই যাব;

তেওঁৰ চকুপানী কোনেও নেদেখে৷

দুচকুত টোপনিয়ে দোলা দিলেও 

নোৱাৰে মুদিব দুচকু,

কণমানিটো যে সাৰে আছে ;

কণকণ হাত দুখন চাই 

মন ভৰে৷

ভাগৰে জুৰুলা দেহাটো…

পাহৰি যায় ভোক

পাহৰি যায় নিশাৰ ককৰ্থনাবোৰ

কণমানিৰ দুচকুলৈ চাই৷

হাজাৰ কষ্টৰ চাপ,

সমস্ত বেদনা

পাহৰি যায়

কণমানিৰ মুখৰ হাঁহিটি চাই।

দুচকুত এটি সপোনে শিপায়

কণমানি নিজৰ ভৰিত থিয় দিব পৰা হয়

ইয়াতেই হ'ল

তেখেতৰ জীৱন সাৰ্থক!