গীতাঞ্জলি দেৱী
ৰাতি পৰে-পৰে কি সৰে বগীতৰা ?
তোৰ উঠনীয়া বুকুৰ হেঁপাহ নে অকাৰণ বেথা ?
ফুলেও জানেচোন ঋতুৰ কবিতা ।
ওঁঠ চুমি কি ৰাগেৰে ৰাগীয়াল মতলীয়া বাঁহী ?
তোক জোকাই নে নিচুকাই ?
কিয় লুকুৱাই থৱ' তোৰ লাজেধোৱা হাঁহি ?
বতাহেও আনেচোন আশাৰ বতৰা ।
নৈ লৈ কিয় হালে ন-ডালি ভলুকা ?
কিয় কঁপে ঘনে তোৰ চন পৰা কলিজা ?
পখীয়েও জানেচোন গীতৰ মালিতা ।
কাৰ উশাহত উঠা-নমা কৰে তোৰ কঁপালৰ অবাধ্য অলকা ?
বগীতৰা কেনেকৈ খহে তোৰ লাজ-ঢকা ৰীহা ?
নদীয়েও ভাঙেচোন ওখকৈ গৰা ।
