জুৰি ৰাজখোৱা গগৈ
শিলাকুটিৰ নিপুণতাৰে
এফালৰ পৰা আমি খোদিত কৰি গৈছোঁ নিজক
ভাঁজ দিছোঁ আৱেগ ,অনুভূতি আৰু চিন্তাক ।
আমিবোৰ এতিয়া শিলালিপিত খোদিত কৰা
একো একোজন সুনিপুণ শিলাকুটি
প্ৰাচীন শিলালিপিত খোদিত
একো একোটা শব্দৰ দৰেই
আমিবোৰ এতিয়া দুৰ্বোধ্য ৷
কোনে পঢ়িব পাৰে
ক্ষয়প্ৰাপ্ত আখৰৰ দুৰ্বোধ্য ভাষা
স্বনিৰ্মিত আমাৰ শিলালিপিবোৰত এতিয়া
হাজাৰ বছৰীয়া শেলুৱৈৰ পিছল তৰপ ;
যি তৰপ ভেদি আমাক চুব নোৱাৰে
ৰৌদ্ৰস্নাত দুপৰীয়াৰ উমাল স্পৰ্শই
পিছল শেলুৱৈত এচাৰ খাই উফৰি পৰে
আমাৰ সভ্যতা
চুচুক চামাক কৰি আঁতৰি যায়
বৈ আহিব খোজা বতাহৰ স্ৰোত ৷
আমিবোৰ যে নিপুণ শিলাকুটি
সেয়ে আমি শিলত খাজ কাটি
খোদিত কৰিব পাৰোঁ মগজু
দুৰ্বোধ্য লিপিৰে শিলত লিখিব পাৰোঁ
নিজক ।
মৰাণহাট ঊষাপুৰ
জিলা-চৰাইদেউ
পোৱা -মৰাণহাট
